TALAMSIK NING SINTA
(balangkas Tanka)
kayaspak abak
eku agyung salikut
kaplas misamut
migmarka king ulunan
besa ning lua nabengi
uman ku ngeni
aliwa na ring labi
nune ing kintal
memoryang manyalipsip
ning pamisanmetung ta
tinerak kata
alang tigtig musika
kumpas king indak
kakambal da ring saldak
ding kekatang papalwan
agkatan muku
angga king alang-anggan
ipagtumayla
na ning kanakung pluma
lablab ding kekang labi
at sana naman
ing napun kung mitundu
ulit meng gisingan
king palad mung malambut
tapikan 'lang patugut
takapsilim na
aplusan ing lisangan
salilung muku
kilub ning kekang palda
takman ku’ing kapaldanan
bravenet.com
