Mimosa Pudica
(Sampagang Malamarine)
mimosa pa kaya ing palagyu keka
nung piblasan dakang suksuk ala nala
nung mawala nala mataram mung suksuk
sutlang alpombra kang keka ku manyuluk
pamisalubung da ring kekatang mata
aku ing merine e mu ayalata
aku ing merine bigsu ku melaso
malambut mung lawe tinaglus yang sasyo
bagya ka metagkil obat sinaguli
dinuku kang agad selikut me’ing ayli
tunggen daka lagyu anting lakambini
ugaling mahinhin katutubung lipi
bakung e mansakit king suksuk manyungkit
manyapin makapal talnan dakang pilit
sanung makarine sabyan mung mabinit
memaltuk mung suksuk o banglung menyitsit?
mimosa, e ka mu basta singo dikut
na maski nukarin tutubung malikut
libutad ning kekang pusad a makiput
malagung sampaga karin ya susulput
e ka malamarine keka manwala ku
nune akakit kung mabaya ka yatu
ngeni tanam daka king metung a pasu
sesen dakang lugud bukal-ibat pusu!
bravenet.com
