"BUNGA SASA" ing pamagat ning libretang sinulat ku
pauli na ning aku anak kung mibait Sasmuan (Sasa-muan)
na dati mas balu o kilala ya king awus a Sexmoan.
 
Inyang malati ku,
maski nukarin manakit kung sasa.
King pampang da ring ilug.
King gilid da ring pilapil. 
King kilub da ring playsdan.

Karing sasa, sasalilung la reng miyayaliwang ayup
antimo reng uwis, tika, maria kapra, kanugtug,
bako bengi, tikling, kanisig, talamuri, pasdal,
pasawa, pipit, denas, baka-baka, batu-batu,
sibad, bulan dagat, pariuk-pariuk, silin-silinan,
tarat, tankiring, peskarul,  kandungango,
kulayu, sabukut at dumara.

Karing sasa, maglungga la
reng ema (matangal, bulik)
talangka, damuku, gurumeti.
Manakit ka namang lukban, parus-parus,
tugak, dagis malutu, barak, timbambarak, 
palaspas, bitin, kamamalu, at kanunugak.

Ating susulapo tulang (damulag, karayum);
gagapang a bugsuk, piris; kukusad a susu.

Atin mu namang tutubung
balanggut, tike, dalwari, apulid, lagulu,
kangkong, water lily, bako, at saka palapat.

Nung ring  sasa
sangtuaryu la karing ayup ampon asan 
santungan na noman ning tau ring sasa
king aldoldo pangabiyayan.

Liban keng pamanima, marakal ku abalung
miyayaliwang pamanyakap asan,
antimo reng patukba, paluwe, paduwas, kitang, pintul,
panti, sakag, salap, bukatut, dala, salakab, pasabal,
baklad, galadgad, kubkub, bunbun, biyakus, iskrin. 

Kareni makakwa o mararakap la
reng bulig, (bundalag, bundaki),
reng biya (biyang puti, bakuling, kuwayan, bangenge)
palus, igat, talunasan, kanduli, itu, tilapia,
ema, alimasad,  bangus, talangka,
paro (buntukin, dapil, suwai, alamang,  
sugpu, salamantorak, ulang)
dulum, likauk, suluwi, pingo, karpa,
samaral, liwalu, sapsap, badbad, 
karag, ampo na reng gurami, 
malibasan, kalibukab, balulungi.

Ding pilulanan o pidatukan karing asan
ilapin ding tiklis, buslu, swiki, banyera.

Ibalik ku karing sasa,
aku medagul ku
libutad ning kabiyayan
manibat karela. 

King gulut bale
sasa lang mangatas, mangaragul.
Mapilan karing panagdag biye
manibat king sasa ilapin deni:
    ing mayumung tuba king tukil,
    ing aslam king tapayan,
    ing tulud a banus suman,
    ing pinaud a panatap bubungan,
    ing pamalis tingting,
    ing panangab nang palapa, 
    ing manyaman a bunga sasang
       linutu king arnibal ating
       mabanglung bulung pandan
       at ing bunut ning butakal
       a panisis gasa ning bangka,
       dalig at lande ning bale,
       eran ampon kuran.

Ing b'ye ku mebiasa ya't minasa
libutad palibut ning amanung sasa.
Aku ing anak Sasa-muan. 
Aku ing Bunga Sasa.   

                             
          Tony Mercado Peña
          Most Outstanding Kapampangan Award 2007 - Culture & the Arts
          436th Aldo Ning Kapampangan
          Bren Guiao Convention Center, San Fernando, Pampanga
          December 11, 2007